التقارير

الويك إند في وسط البلد.. كايروكي وطنبورة وبطاطس!

سمر فتحي 6 أبريل 2017

دقيقة واحدة

مساء النشاط و الحيوية الإسبوع ده هيكون نشاطه غير محدود حركة للكبار و قبلهم الأطفال

نبدأ بيوم الجمعة 7 أبريل

خدوا أولادكم الساعة 12 و روحوا إفطروا سوا و جربوا منيو البرانش من عيش وملح الساعة 12 الضهر

و بعد الفطار ممكن بطلعوا على ساقية الصاوي و اللي مسرح العرائس فيها هيقدم لأولادنا مهرجان البطاطا و البطاطس و هيكون في عروض أكروبات و و مهرج و أفلام أطفال و هيستمتعوا جداا و ده هيكون الساعة 3م

أو خليك في عيش وملح لان الساعة 4م العروسة ريحانه و صاحبتها سها سعد هيقدموا عرض للأطفال يحكوا فيه عن النحل و إزاي بيعمل عسل يعني خروجه و فسحه و لعب و تعليم

و لأصحابنا اللي عاوزين يسمعوا إنشاد فعلي الهلباوي بيقدملكم حفل بساقية الصاوي الساعة 7:30م

و الساعة 8م فرقة الطنبورة بالإشتراك مع فرقة الكف الأسواني هيقدموا عروضهم على المسرح المكشوف

أما عشاق الناي و عزف المقام فموعدكم مع الفنان محمد عنتر بمصاحبة الروسي ديمتري في حفل عزف على الناي و العود الساعه 8م برووم آرت سبيس

و أخيراً مهرجان وسط البلد للفنون المعاصرة “دي كاف” بيقدم عروض أفلام رقص قصيرة بمسرح الفلكي الساعة 8م وهيتم عرض لأفلام صنعت بين ٢٠١٠ و ٢٠١٦ مثل “Anim” و “Move Away” و “Silencios” و “Lynching” والفيلم المرشح لجائزة الأوسكار “Timecode” والمنتج عام 2017.