مساء الخير ،، كل سنة وإنتم طيبين، رمضان خلاص بيخلص والعيد على الأبواب وبالمناسبه دي نحب نفكركم إن وسط البلد مبتنمش، اخرجوا و اتفسحوا وصوروا وابعتولنا وإحنا هننشر.
نبتدي بيوم الجمعة 23 يونيو
و كالعادة فطارنا في عيش وملح على موسيقى العود و القانون ومتنسوش تاخدوا كوبون الخصم من أخر عدد لمنطقتي واللي هتلاقوا منه نسخ في عيش وملح
و الساعه 9م معادنا في ملاذ عشان نسمع أغاني لسيد درويش باسلوب جديد بأداء جديد، بـ3 آلات مختلفة الناي والطبله والجيتار مع مواهب جديدة في أمسية غنائية بملاذ
و في الربع فرقة رباعي أوتار هتقدم مجموعة من الأعمال الكلاسيكة الشرقية في ليلة رمضانية بطابع شرقي مميز الساعة 9:30م
أما لوكا فوكال فريق دعسوقة صاحبة أغنية فمنتظراكم مع باقي أعضاء الفريق الساعة 9:30م في رووم آرت سبيس
أما فرقة المولوية المصرية بقيادة الفنان عامر التوني فحفلهم مقام بالمسرح المكشوف 9:30م
و في علبة آلوان فرقة وصلة سماع للإنشاد الصوفي بتقدم حفلها الساعه 9:30م، الفرقة بتقدم إنشاد بقصائد صوفيه من كلام العارفين بالله والأئمة بألحان تراثية.
أو احضر حفل لفرقة “البتول” هي أول فرقة إنشاد أعضائها من الفتيات فقط في مركز مولانا
أما يوم السبت 24 يونيو
فلو عندك موهبه و عاوز تطلعها على مسرح أو لو عاوز تسمع و تتفرج على مواهب جديدة فمكانك في رووم آرت سبيس و اللي بيقدم ليلة ميكروفون مفتوح الساعة 9م
و في مسرح الضمه فرقة إستابينا هتقدم أغاني تراثية وشعبية من مختلف أنحاء العالم الساعة 9:30م
و في ساقية الصاوي فرقة إفتكاسات حفل رمضاني من مقطوعات موسيقية أصلية تجمع بيت موسيقي الجاز الغربية و موسيقي شرقية الساعة 9:30م
و كل سنة و انتم مبسوطين