الويك إند ده في وسط البلد كله نشاط وحيوية وفعاليات مختلفة وحاجات كتير ممكن تتعمل
نبدأ الجمعة 31 مارس
روحوا عيش و ملح إفطروا من منيو البرانش بتاعهم و كمان اسمعوا مزيكا جاز لطيفة، وده هيكون من الساعة 12ظ للساعة 3م
و الساعة 7 مي عبد العزيز هتقدم حفل غنائي في الربع
وفي ماجنوليا في نفس الوقت هيكون فيه ليلة كاريوكي ممتعه روح غني وسمع الكل مواهبك المدفونة 🙂
أما سيماتك فهتعرض الفيلم التسجيلي “لو بيتي شا” للمخرج شريف نخلة الساعة 7:30 م
وضمن فعاليات مهرجان حكاوي الجاز أكرم الشرقاوي جروب وهانترتونز باند هيقدموا حفل موسيقي مجاني في قاعة إيوارت بالجامعة الإمريكية الساعة 8م
وفي المسرح الصغير الفنان يحي خليل عنده حفلة جاز الساعة 8م
ولو لسه محضرتش باليه عروض زوربا فدي آخر فرصة علشان تلحق تحضره الساعة 8م على المسرح الكبير
ولو عاوز تسمع أغاني تراثية إفريقية اطلع على مساحة رووم آرت سبيس، فيه حفل لمشروع لوبيريا الساعة 8م
وفي علبة آلوان هنسمع أغاني لسيد درويش والشيخ إمام و مكاوي من فريق بهية الساعة 8:30م
ختموا اليوم بقى في مسرح الفلكي مع عازف الترومبيت والسنطور والمغني والملحن أمير الصفار و ده هيكون الساعة 9م
وأما يوم السبت 1 إبريل
حفل إنشاد صوفي لفرقة الفراديس بالربع الساعة 7م
و جاليري المشربية الفنان أمير عيد هيقدم حفل غنائي على صدى معرض الوداع الأخير للفنان هاني راشد وده هيكون الساعة 7م
وتحيي الفنانة نسمة عبد العزيز حفل موسيقي في المسرح المكشوف الساعة 8م
ولعشاق التراث والفلكلور فرقة أسياد الزار هتقدملكم عرض الزار البلدي في مسرح الضمة الساعة 8م
أخيراً بقى استمتعوا وتابعوا أجندتنا دايما عشان تعرفوا أهم الفعاليات و الحفلات