التقاريربكرة في وسط البلد
الويك إند في وسط البلد.. عندك 3 مسرحيات و6 حفلات و1 ستاند أب كوميدي

مساؤكم فرح وانبساط
زي ما عوّدناكم كل ويك إند في وسط البلد، جمعنا لكم أهم الفعاليات والحفلات الأسبوع، واللي بتبدأ بافتتاح المهرجان القومي للمسرح، وده هيكون بجانب فعاليات تانية كتير.
نبدأ بيوم الجمعه 14 يوليو
عشان اجازة ومن حقنا نصحى متأخر، عيش وملح عاملة فطار متأخر يبدأ الساعة 1م وهنسمع مزيكا جاز ونختار من منيو البرانش اللذيذ.

و الساعة 4م ممكن تتحركوا على الجريك كامبس عشان تستمتعوا بـحفل أندرجراوند لمدة 6 ساعات متواصلة. في حفل مشارك فيه أكتر من 5 باندات وفنانين، وإيراداته هتنقسك لجزء هيروح لدعم الفرق المشاركة، والجزء التاني لمؤسسة أهل مصر للحروق

وزي ما قلنا إن في المهرجان القومي للمسرح فهيتم عرض المسرحيات دي في مسارح وسط البلد، والعروض هتتعاد يوم السبت
مسرحية أترك أنفي من فضلك المأخوذة عن ثلاثة روايات هي “أليس فى بلاد العجائب”، و”قضية أنوف”، و”الأنوف المتصارعة”، بمسرح مركز الهناجر للفنون بدار الأوبرا في الزمالك الساعة 6م والدخول مجانًا بأسبقية الحضور

مسرحية الجلسة.. شغل عفاريت واللي بيناقش العالم السفلي، وهو عالم الجن والعفاريت بشكل أكثر تطورًا، بمسرح الطليعة 8م والدخول مجانًا طبعًا
أما عشاق فرقة الحضرة فهتحتفلوا معاهم بعيد ميلادهم الثاني في ساقية الصاوي الساعة 7:30م

أما الفنانة مي عبد العزيز فهتقدم أغانيها ” أنتِ لسة جميلة وأشجع واحدة وغفرانك وغيرهم” في حفلها في ساقية الصاوي الساعة 8م

ونختم مع عشاق أغاني بينك فلويد فموعدكم مع فريق Paranoid Eyes في “رووم آرت سبيس” جاردن سيتي الساعة 9م

ونروح ليوم السبت 15 يوليو
نبدأ مع مؤسسة “رسايل آدم” للتنمية و اللي بتقدم ورشة “كـان فعل حاضر” وهنتعلم تصميم ملابس للأطفال من إعادة التدوير في ملاذ الساعة 11ص وحضورها مجانًا

و عشاق الإنشاد فموعدكم مع حفلة لوصلة سماع بمشاركة وحضور العالمي التنزاني محمد محيي شوقي، وهيقدملكم مزيجًا روحانيًا بين المديح المصري والمديح السواحيلي الأفريقي في ساقية الصاوي الساعة 7م

و الفنان علي قنديل مستنيكم في ساقية الصاوي، برضه عشان تحضروا حفله ستاند أب كوميدي “بطل العالم في الحاجات” الساعة 7:30م

و الساعة 8م و ضمن فعاليات المهرجان القومي للمسرح هتعرض فرقة البروفة عرضها “الطقوس” على خشبة مسرح ميامي بوسط البلد، العرض مأخوذ عن النص المسرحي (طقوس الإشارات والتحولات) للكاتب السوري الكبير سعد الله ونوس. والعرض مستمر ليوم الأحد

و أخيراً مسرح الجنينة بيقدم فرقتي بهية و صفصافة في حفل هيبتدي الساعة 8:30م

استمتعوا وانبسطوا 🙂