مساء الفُسح وأحلى خروجات و كعادتنا كل خميس بنقدملكم دليل منطقتي الموسّع لأهم و أحلى خروجات و فسح الويك إند وده عشان تنبسطوا وتتفسحوا و بأسعار رمزية جدًا
نبدأ الجمعة 19 مايو
و في شارع عدلي هـنفطر و نسمع موسيقى جاز و نختار من منيو البرانش الخاص بمطعم عيش وملح
مش بس الجمعة لا والسبت كمان من 12 ظ إلى 3م
ولكل عشاق الإنشاد و بالأخص فرقة الحضرة فمستنينكم في الساقية الساعة 7م سعر التيكت 40ج
ولو مش عاوز إنشاد وبتحب العود، شادي مؤنس وفرقة حكايات هيكون في الساقية الساعة 8م وسعر التيكت 40ج
أما عشاق الدرامز فالعازف أحمد ربيع هيستناكم في المسرح المكشوف بدار الأوبرا المصرية الساعة 8م و سعر التيكت 35ج
و في علبة آلوان عشاق الساكس متجمعين الساعة 8م عشان يسمعوا عزف عم محمد اللي بيلعب ساكس من أكتر من 30 سنه سعر التيكت 50ج شامل المشروب
أما مساحتنا الشهيرة رووم فجايبالنا عازف الناي محمد عنتر الساعة 8:30م وسعر التيكت 50ج
أما يوم السبت 20مايو فهو سبت الأفلام و عشاقها
نطلع على مركز جسور بالزمالك الساعه 6 عشان نتفرج على فيلم LION و الدعوة عامه ومجانيه
و في علبة آلوان هنشوف فيلم TICKLING GIANTS الساعة 7م وسعر الفرد 50ج شامل المشروب
أما في ماجنوليا هيتعرض فيلم Pink الساعة 7م و الدخول مجاناً
أما لو ملكش مزاج لأفلام فساقية الصاوي الساعة 5م بتستضيف سيرك ماندراغورا وهو أداء مسرحى بلا كلام حيث اثنين من المهرجين يحكيان قصة عن الكوميديا والحب حيث يتم فهم الحوار والأفكار دون كلمات و سعر التيكت 50ج
ولو ملكش في الأفلام بس عاوز تسمع طرب فالفنانه سمر الحسيني مستنياك في الساقية برضو الساعة 7:30م و سعر التيكت 30ج
استمتعوا ومتنسوش تتابعونا عشان تعرفوا كل جديد في وسط البلد
تعليق واحد