مساؤكم فل، النهاردا الخميس يوم طويل و هيبدأ من بدري، بحفلات مزيكا وعروض سنيما في وسط البلد
هيبتدي الساعة 5م في دار الحكمة بنقابة الأطباء، شارع القصر العيني، و عرض الفيلم العربي “الشتا اللي فات” بطولة عمر واكد وفرح يوسف.
وممكن تحضر ورشة في الإخراج السينمائي في مركز أوزيريس في جاردن سيتي، ورشة الإخراج السينمائي بيقدمها أمير رمسيس الساعة 6م وهي ضمن برنامج أوزيريس لورش اليوم الواحد.
ولو بتحب التراث المولوي المصري والإنشاد، فرقة المولوية المصرية ومنشدها عامر التوني بيقدموا حفلهم بقاعة النهر في ساقية الصاوي بالزمالك الساعة 7م.
أما لو عاوز تسمع “زار”، مسرح الضمة في عابدين بيقدم حفل لـ”دراويش أبو الغيط” الساعة 8م.
أما اللي بيحبوا مزيكا الجاز قدامهم حفلتين الأولى في رووم آرت سبيس في جاردن سيتي حفل لنهى فكري، رامي عطاالله وإيهاب بدر الساعة 8:30م
والتانية بيحييها الفنان يحيى خليل في المسرح الصغير بدار الأوبرا المصرية بالزمالك 8م
عمرك سمعت مزيكا من غير آلات؟! علبة آلوان الساعة 8م بتستضيف فريق “العازفون بدون آلات” واللي بيقدموا أنواع مختلفة من المزيكا بدون آلات في تجربة جميلة وفريدة من نوعها.
انبسطوا..