يعد تطوير ممر الألفي في مرحلته الثانية، المشروع الأهم مؤخرا ضمن المشروعات التي تشهدها وسط البلد.. في وجهة نظر نعرض بعض آراء مواطني ورواد وسط البلد في هذا التطوير..
ممر الألفي بقى جميل جدا بعد التطوير، وفعلا حاسين بفرق كبير خصوصا إن كان فيه باعة جائلين كتير والقهاوي كانت مسيطرة على الشارع ومكوناش بنعرف نمشي، لكن دلوقتي الفرق واضح وكل حاجة انتظمت، ومبقاش حد من أصحاب القهاوي بيتعدى على المساحة بتاعته، ورغم إن المساحة اللي بنقعد فيها على القهوة قلت، لكن كده كويس، ويا ريت شوارع مصر كلها تبقى بالنظام والجمال والنضافة دي، مش بس شوارع وسط البلد.
التطوير مفيش أحسن منه، كل حاجة بقت منظمة وأصحاب القهاوي التزموا بالنظام ده، وكل قهوة دفعت عشان تطور المكان بتاعها، وكمان حطينا أحواض زرع عشان تخلي فيه منظر جمالي، بالإضافة للكراسي البلاستيك اللي بدلناها بالكراسي الخشب لإنها مريحة أكتر وخلت المنظر أحسن، ومع ذلك مفيش تغيير في الأسعار وكلها في متناول الفئات كلها، أهم حاجة إن الناس تحافظ على التطوير ده وتلتزم بالنظام، وأتمنى أشوف شوارع كتير بنفس جمال ممر الألفي.
طبعا فكرة التطوير فكرة جميلة، الشارع بقى شكله زي الشوارع اللي بنشوفها في بلاد بره، أهم حاجة إن الشعب نفسه يحافظ على المكان عشان ندي دفعة تطوير لشوارع تانية، كمان فكرة وجود الورود والكنب بقت أحسن، والأحواض الحديد حددت مساحة القهوة عشان محدش يتعدى الحدود بتاعته، ومحدش يضايق الناس اللي ماشية، وأنا شايفة إن لسه التطوير محتاج يكمل، من خلال توفير صناديق للزبالة وعمال نظافة، وتنضيف الشارع أول بأول.
منظر الممر بقى حلو أوي، خصوصا لما أصحاب القهاوي حطوا أحواض للزرع، بقى شكل الشارع زي شوارع باريس، فيه منظر جمالي ونضافة وإضاءة، لكن فيه سلبيات بتحصل بالليل منها إن أطفال الشوارع بيناموا على الكنبات اللي في الشارع وفيه متسولين كتير بشوفهم، وده بيخلي مفيش أمان شوية، لكن على كل حال التطوير شيء كويس جدا، بس أهم حاجة الناس تحافظ عليه، وطبعا لازم يحصل تطوير لشوارع تانية بنفس النظام.
التطوير اللي حصل في الألفي ده صورة مشرفة لينا بره مصر، مصر مش أي دولة، دي أقدم دولة في التاريخ، لازم تبقى على المستوى الجمالي والحضاري اللي يليق بيها، ولازم الناس تحافظ على التطوير، ونطور شوارع تانية كمان خصوصا الشوارع المحتفظة بالتراث القديم، عشان السياحة ترجع تاني أكتر من الأول، إحنا بلد الأمن والأمان، ومينفعش يبقى فيه عشوائية في الشوارع، عاوزين نحسن من صورتنا قدام نفسنا وقدام العالم.
أنا بشتغل في ميدان عرابي بقالي أكتر من 18 سنة، وفعلا حاسس بتغيير كبير جدا وجميل، ولكن العشوائية هيا اللي بتبوظ كل حاجة، يعني رغم التطوير إلا إن لسه فيه فرن عيش في الشارع وده ميناسبش الوجه الحضاري، وكمان العمارات اللي هنا بقالها مئات السنين ومش موجود زيها في أي مكان في العالم، كان لازم الاهتمام بيها أكتر من كده، أنا شايف ضرورة عمل قانون خاص لوسط البلد يكافح فساد المحليات ويقضي على العشوائية.