رمضانكم كريم ورمضان السنه دي جاي وجايب حفلاته معاه، أخروجوا الويك إند ده واتفسحوا و نوعدكم تنبسطوا
نبدأ بيوم الجمعه 9 يونيو
الساعة 6م نطلع على عيش وملح عشان نفطر ونستمتع بأحلى أكلات إيطاليه على أنغام القانون و العود والرق و متنسوش تاخدوا نسختكم الجديدة من منطقتي واللي جواها كوبون بخصم 10% على أي فطار أو سحور في عيش وملح و ده ساري يومياً حتى نهاية شهر رمضان الكريم.
بعد الفطار على طول ممكن تطلع تستمتع بعرض ماريونيت للكبار و الصغار في علبة آلوان الساعة 8م
أو لو عاوزين تشوفوا فيلم فإطلعوا على مركز جسور الثقافي اللي بيعرض Homeless to Harvard الساعة 8:30م
أما عشاق الإنشاد فالمنشد مصطفى عاطف مستنيكم في قاعة الحكمة بساقية الصاوي الساعة 9م
أو اسمعوا الأخوة أبو شعر في المسرح المكشوف 9:30م
أما فريق “جنان” فمستنيكم الساعة 9:30م في رووم آرت سبيس
أو اطلع على مسرح الضمة واللي بيستضيف الفنان ياسر مغربي، اللي بيقدم العديد من أغاني التراث وأغاني النفحات الروحية الطيبة بشهر رمضان الكريم على أنغام العود الساعة 9:30م
و نختم الليلة مع حفل فريق وسط البلد في خيمة ريفير سايد بالزمالك 10م
ويوم السبت 10 يونيو
اليوم هيبدأ مع حفل لـعمدان النور بالمسرح المكشوف 9:30م
أو يمكن تحضر حفل الشيخ إيهاب يونس في ساقية الصاوي 9:30م
و في رووم آرت سبيس الساعة 9:30م حفل مشروع “نار” المتخصص في الموسيقى التقليدية والشعبية في أوروبا، والشرق والبحر الأبيض المتوسط.
أما لو حابب تعيش ليلة رمضانيه بحق فعليك وعلى وكالة الغوري اللي بتقدم عرض التنورة لفرقة التنورة التراثية الساعة 9:30م
وأخيرًا ممكن نختم في خيمة ريفير سايد بالزمالك و حفل أحمد مختار الساعة 10م
وبكدة نكون قدمنالكم نشره بأهم الخروجات و الفسح في ويك إند رمضاني نتمنى تنبسطوا و تستمتعوا وممكن تتسحروا ف وسط البلد، إما في مطعم أو على عربية فول من أشهر عربيات وسط البلد